!! كيف تزيد دخلك !!
الاستغفار والصدقة .. والآية أكبر دليل
( فقلت استغفروا ربكم إنه كان غفاراً * يرسل السماء عليكم مدراراً * ويمددكم بأموال وبنين ويجعل لكم جنات ويجعل لكم أنهاراً ) سورة نوح
اما الصدقة .. غير ان لها ثواب واجر عظيم .. تراها تقي صاحبها من الكروب والنكبات ( غلاء المعيشة ) وتكفر للذنوب .. وتبارك في المال وتزيد الرزق
خيارات الزيادة
ممكن تشتغل لساعات أكثر عشان تجني فلوس أكثر
بس حط في بالك الايجابيات والسلبيات من هالزيادة
ممكن تشتغل أكثر من شغله
يعني سمعت ان واحد يشتغل براتب بسيط ويشتغل في مكتبة جرير بالساعات
وأكيد أكثركم سمع قصة الدكتور وسواق تاكسي بنفس الوقت
يعني زيادة على عملك الأصلي عمل بدوام جزئي
استثمر مواهبك وأفكارك
لأحد يقول ماعندي مواهب .. كلكم باسم الله عليكم تهبلون وأكيد يطلع منكم شي
وعشان تطلع درجة في السلم لازم تشيل هالافكار السلبية من راسك
أعطيكم مثال
صديقة أختي كانت تطبع البحوث والمشاريع لأصدقاء أخوانها
ويمكن صديقاتها ومن هالحركة تكسب فلوس .. بس أتوقع أنها تخلي السعر ارخص من سعر السوق
مثال ثاني
صديقتي كانت تسوي أساور بالخيوط الملونة
كثير من البنات طاحوا فيها أيدين ورجلين كانت تبيعها وتكسب منها فلوس
وكل واحد يشوف بايش يبرع ويطلع من هالموهبة بفلوس
ممكن مثلا تصير مدرس خصوصي .. إذا عندك القدرة على توصيل المعلومة للطلاب
عيش اقل من مواردك
لا تسرف
إذا بغيت تشتري جوال مو مشكلة إذا اشتريته مستعمل
وإذا كان جوالك مافيه إلا العافية مو لازم تشتري جوال جديد
إذا بغيت تشتري سيارة كمان مو لازم تشتري جديدة اشتريها مستعملة
تشتري أثاث .. الكترونيات .. اي شي .. مشي حالك بالمستعمل النظيف وغير مغشوش
مو لازم كل صيفية وإلا كل إجازة بين الترمين والا الإجازة الجديدة اللي في وسط الترم الثاني تسافر فيها
مو لازم تاخذ مقعد فيرست كلاس والا بزنس في الطيارة خذ سياحية ومشي حالك
وممكن تحجز على خطوط ارخص وتفي بالغرض واعرف ناس يوفرون آلاف بهالحركة
وإذا كانت الدولة مجاورة لبلدنا الحبيب سافر بالبر ووفر فلوس التذاكر
مو لازم تنزل بفندق 5 نجوم وعند الايليزيه والا برج بيزا خذ لك فندق في منطقة رخيصة ووفر
والا خذ لك شقة يكون ارخص
مو لازم تروح للقهاوي وتشيش : حط بالاعتبار لو كنت تشيش
ولا تدخن كثير إذا كنت تدخن
لا تتكلم ( ين ) كثير في الجوال وتوصل الفاتورة للحد الائتماني بسرعة
صادق الناس اللي تنفعك
طبعا أنت تنفع الناس وان شاء الله هم بينفعونك
والرسول يقول :
المؤمن للمؤمن كالبنيان يشد بعضهم بعضا
وتزوج بنت حالتها المادية زينة تستر عليها ( الله يستر على الجميع ) وفي نفس الوقت تساعدك
والرسول صلى الله عليه وسلم يقول : تنكح المرأة لأربع لجمالها ومالها وحسبها ودينها فاظفر بذات الدين تربت يداك
بس عاد مو تصير مصلحجي وتشفط فلوسها اتق الله فيها .. وتذكر أنها موب مكلفة في مساعدتك
أهم شي يصير برضاها أنها تبي تساعدك
إذا ماتعرف في الأسهم لا تدخل فيها
وإذا تورطت فيها لا تتورط زيادة يوم تشوفه طالع نازل تزغلل عيونك وكل مرة تدخل مبلغ
وإذا تبي تعرف عن سوق الأسهم ادخل دورات خاصة عشان تنفعك ان شاء الله وتعرف متى تدخل وتطلع من السوق
اهتم بتطوير نفسك
ياكثر المعاهد اللي تقدم لغة انجليزية ودورات حاسب ومهارات مختلفة اللي تتناسب مع تخصصك وفي نفس الوقت يحتاجها سوق العمل وكل معهد يتفنن بالعروض وياكثر إعلاناتهم بالجرايد .. بكذا راح يعطيك أفضلية إذا قدمت ان شاء الله ( خصوصا اذا كنت خريج ثانوي ) وتأكد إذا ربي كاتب الوظيفة لك لا واسطة ولا غيرها بتاخذها منك
مجالات جديدة
تقريبا كلنا ندخل الانترنت بشكل شبه يومي لمدة ساعة كحد أدنى
وهذي فرصة كبيرة انك تدور لك على شغله من النت ممكن تكسب فيها فلوس
مثل مصمم جرافيك او مساعد إداري او مخطط للأعمال التجارية او مترجم
عاد دور لك على اللي يناسبك
تخلص من الناس ( النكد )
إذا كان فيه ناس بس ينتقدونك وتحسهم يهبطون من عزيمتك .. البعد عنهم غنيمة
لأنهم من جد مايجيبون إلا النكد ولا عندهم شي غير أنهم يحسسون الواحد ان مامنه فايده
بس المشكلة اذا كانوا قريبين منك : زوج(ة) او اخ(ت) .. الخ
هذولا حاول ماتجيب لهم طاري عن مخططاتك عشان مايغثونك
الانضباط والاستمرار
لازم تلتزم بخطة الادخار اللي حطيتها لنفسك .. عاد لا تصير بخيل على نفسك مرة
وعلى قولة القايل اما حبى والا برك .. خلك وسط وقل بصوت عااالي
لا
لا
لا
للإنفاق الغير ضروري
راجع مصادر إنفاقك في الأسبوع او الشهر
بكذا ممكن تعرف وش الشي اللي يطير فلوسك وتستبدله او تشيله من حسابك إذا كان شي كمالي
المهم دبر نفسك
تابع تقدمك
شف اللي نجح من هالخطوات عشان تستمر فيها
واللي مانجح في هالحالة لازم تدور على خطوات بديلة
أشياء كثير ممكن تزيد دخلك .. التفاؤل ويكون ظنك بالله انه بيساعدك ان شاء الله والحديث القدسي يقول فيه الله عز وجل ( انا عند ظن عبدي بي ) العزيمة والإصرار والثقة بالنفس .. اجتمع مع أصدقائك وفكروا بحلول ممكن ترفع حالتكم المادية او كيف تسوون مشروع وكل واحد يدخل فيه بمبلغ بسيط
وياليت اللي تخصصهم إدارة واقتصاد والا إدارة أعمال يفيدوننا
منقول من ايميلي السحري للفائده 
أهلا و سهلا بك أخي الكريم في منتديات لمعه ,, للتسجيل اضغط هنا !!
07-03-2008, 06:05 PM
كيف تزيد دخلك
المواضيع المتشابهه
