والله لا اعرف ما الذى يريده هذا الرجل
فوجئت به على إحدى الفضائيات فى نهار رمضان ,وكانت أول مره أراه .. وآخر مره ان شاء الله
رجل عجوز يرتدى جلبابا أزرق يذكرنى بشحاتين السيدة
ولا يكاد يكمل كلمتان على بعضهما ,تستضيفه مذيعه ملونه الاطراف يصاحبها مذيع لا يفقه أى شىء فى احكام الدين .. عندما رأى هذا الرجل مضيفه بهذا الشكل
سأل : أنتم تعرفون كويس فى الدين ؟
أجابا : مش قوى .. العادى يعنى
البحبحانى : حلو .. أفتى براحتى بقى
قعد الرجل وتبحبح وربع رجليه وكأنه يجلس فى مصطبة المتولى ثم قال :
أنا بعد بحث شديد فى أصول الدين ومراجعة الفقة والشريعة
أكتشقت اكتشاف خهطير ..
خير يا مولانا ؟؟
تصوروا .. إن السجاير مش بتفطر فى رمضان -
مش معقول -
المذيع : والله العظيم بتتكلم جد ؟
البحبحانى : أيوه يا ولد . أمال انا جاى هنا أهزر .. السجاير لا تفطر لأنها ليست أكل أو شرب ولا تدخل المعده
أخذ المذيع يتحسس علبه سجائره بشغف
يعنى ادخن وأكمل صيام ؟؟ -
عادى جدا .. ولاا كأنك عملت حاجه -
المذيعة : طيب والشيشه يا سيدنا الشيخ ؟؟
حلال حلال حلال .. الشيشه لا تفطر ولا تفسد الصيام -
دا ؟؟ شىء بديع قوى .. يعنى انا وصاحباتى ممكن نضرب حجرين قبل ما نيجى التليفزيون الصبح ؟؟
أكيد .. -
والاحسن لو تبعتى تجيبى لنا شيش هنا نشيش قدام الشاده المشاهدين عشان يطمنوا خالص ..
ثوانى يا مولانا ..-
أعزائى المشاهدين .. رمضان كريم .. فاصل ثم نعود لنواصل مع
( العلامة ( جمال البحبحانى
نرى اعلانات مليئه بمزز الفضائيات ,وأعتقد انه كان يجب ان يسبقها تنويه بأنها إعلانات للكبار فقط أو من التصنيف 3 حسب
رأى (الاوربت) وتحتوى على مشاهد قد لا تتناسب مع المحافظين والصائمين كذلك ..
انتهى الفاصل لنجد الديكور قد اختلف تماما حيث جلس كل منهم متربعا على كنبه وبيده ( لى ) شيشه معتبره وأخذ يشيش فى استمتاع
البحبحانى : شفتوا بقى يا ولاد .. سهله خالص .. ولا تفطر ولا حاجه
المذيع : معاك حق يا مولانا .. أنا ضربت حجرين ونص لحد الوقتى وبرضه حاسس بمعاناه الصيام .. واكتر
البحبحانى : يبقى ثوابك أكتر ان شاء الله لانك بتعانى اكتر
المذيعه : انا اللى بعانى اكتر لان الشيشه مكتومه والولعه نايمه
البحبحانى : ورينى كده
أخذ يشد من الشيشة حتى ملأ الاستوديو بالدخان الكثيف
البحبحانى : خدى يا قطه .. الولعه تمام بس شدى جامد
المذيع : يا سلام لو فنجان قهوه بقى مع الشيشة
البحبحانى :وماله يا بنى حد قال ان القهوه بتفطر
المذيع : أمال مش بتفطر ؟
البحبحانى : لأ طبعاًَ .. اللى بيفطر هو كل حاجه تدخل الجوف .. إنما القهوه بتطلع على الدماااااغ عدل .. أنا بشربها مظبوط
المذيعة : حالا يا مولانا طب والشاى برضه على الدماغ ولا إيه ؟
البحبحانى : الشاى الساده فقط يا بنتى .. إنما لو شاى باللبن يفطر وتخسرى صيامك والعياذ بالله
تحسس المذيع جيبه بتردد ثم سأل : بقولك إيه يا مولانا ..
بما إن السجاير والشيشه مش بيفطروا .. كنت عايز اسأل عن الحشيش يعنى ..إيه نظامة معانا ؟
البحبحانى : أنتم قلتوا لى مالكوش قوى فى الدين .. صح ؟
المذيع والمذيعه فى نفس واحد : خااااااااااااالص
البحبحانى : حيث كده بقى أحب أقول إن الحشيش دا نبات .. والنبات من مخلوقات الله .. اتكل على الله يا بنى .. معاك تركى ولا أفغانى
المذيع يخرج ورقه سيلوقان ملفوف بها شىء ما
المذيع : تركى يا مولانا
البحبانى : لأ .. التركى مش حلو .. مش كميل .. يشحط فى الزور
وبعدين الاتراك دول ناس علمانيين أكيد الحشيش بتاعهم بيفطر
يخرج المذيع قطعه أخرى
المذيع معايا حته تانتيه ما بتفطرش أهى .. أفغانى
البحبحانى : أيوه كده فى السليم .. مش عاييزين نخسر صيام يوم
وهكذا مضى البحبحانى يحلل ما يطيب له من دخان ومشروبات وشيش وحشيش وطفح تلاته قهوه وقزازه كولا ,. كل هذا وهو يقنع المذيعين المغيبين أصلا ,. أنهم ما زالوا على صيامهم
وبدأ مفعول الحشيش
البحبحانى : أنتم عارفين يا ولاد غن الصيام مستحب فى رمضان .. خصوصا الاثنين والخميس
المذيعة : والله بحاول أواظب على اليويمن دول على قد ما اقدر
المذيع : انا بقى مش بفوت يوم منهم .. صيام الاتنين والخميس فى رمضان شىء مقدس بالنسبه لي
ثم طلع لنا الباشمهندس بفتوى اخرى وهى ان الحجاب ليس فرضا ( الحجاب وليس النقاب ) حتى أنه سيفتى بأن صلاه الظهر سنه مؤكده
هذا الرجل المدسوس على الدين والمتمسح بعباءه رجل العلم والمفكر الاسلامى , يوفر الكثير على أعداء الاسلام الذين لا يتعبون أنفسهم بمحاوله مهاجمه الاسلام ..فالبحبحانى كفيل بالقيام بدور عشره أعداء فى آن واحد
أهلا و سهلا بك أخي الكريم في منتديات لمعه ,, للتسجيل اضغط هنا !!
20-09-2008, 05:34 PM
العلامه البحبحانى
