صبحهم بالنور والسرور .. الله حيهم كل واحدن باسمه .. واللي ماعنده اسم الله يحييه باسم أخوه (( بدت المصاله )) !

والله من زمان عن الصرقعه .. لي عنها فوق السنتين يمكن .. شكلكم تقولون من هالبثر اللي دلّه على مكاننا من جديد .؟

نبي ندخل بالموضوع دغري < خواطرهم الشامي

يا أختي بالله اذا سألوك ..
وهل تقبلين بزوج يلبس نظارات؟؟!!
اقول تلايطي ولايكثر !!يعني من جدكم تشرطون هو فيه رجال علشان تقولون يلبس نظارات او لا؟!
العوض ولاالقطيعه ولايكثر واحمدوا ربكم و اول واحد يطق الباب قولي موافقه وماجاكم علي ..

يا عبد الله اذا سألوك..
وهل تقبل ان تتزوج امرأه لاتعرف عنها شيء؟؟!!
اقول لا تكثر بربستك!! يعني تبي تقنعني انك بتتزوج وحده تعرفها !
الله يطول باعمار اميماتكم وادعوا ان الله يبارك وتطلع البنت تشبه نانسي ..




تمهيد ..



ختاما وقبل سرد التفاصيل اتمنى اتباع الاتي للاستمتاع بالقصه لاخر وهله ..

1- حاول تصرف اي واحد جالس جنبك وفي حالة كان اللي جنبك اكبر منك اغلق النافذه حالا والا ترى ماعاد انت شامن ريحة النت

2- يمنع تناول المأكولات والمشروبات منعا باتا .. كما ان التدخين مسموح بجميع انواعه وحبذا لو كانت الغرفه مقفله حتى تعجعج زين

3- حاول ان تبتعد عن الشاشه قدر الامكان وفي حالة الطوارئ ستسقط عليكم اكياس الاوكسجين اجحدوها ولا تخافون حتى لو انكتمتوا عادي مافيه طلعه الين تكملوا القصه

4- نتمنى لكم اسعد الاوقات برعاية بسكوت ابو ولد فخر الصناعه الهنديه

5- مافي شي بس تلايط انت وياها خلاص بنبدأ




نبذه سريعه



اخوكم خواطرهم .. شاب عشريني العمر .. توني خارج من فترة مراهقه .. وكأي شاب توه طالع من تلك الفتره وتشوهاتها ..الخشم منتفخ على مصرعية تقل شكامين جمس و حبوب الشباب لاعبة في الوجة صح والجسم ما تدري وش يبي ! اليد اليمنى اطول من اليسرا والركب كلها جايه يمين!!

خواطرهم انسان خجول وحياوي وفي حاله عايش .. حياته مقضيها بين الكليه والبيت والاستراحه

في الكليه .. خواطرهم ماشي في حال سبيله لايعرف شلل ولا قروبات ومعروف بالكليه باسم الوحش لانه مشعر بطريقه عجيبه تخليه يطق لسيد زيان باصبع

في البيت .. حياته هادئه جدا مع اسرته الصغيره المكونه من ابوه وأمه واخته الصغيره

خواطرهم جديد على الاستراحه ومازال في طور تلقي اصول البلوت وحركات الشباب .. في الاستراحه ماينادونه الا العجل لانه كلما جاء الا ستراحه يقعد على المركى ويقول انا مستعجل بمشي ودايم هو آخر من يمشي



حياة الشقا..



كعادة خويكم خواطرهم تعشى مع اهله وطلع لاخوياه بالاستراحه ..

دخل خواطرهم الاستراحه والشباب ملتفين حول ناصر وهو يسولف..

ناصر.. تصدقون ياشباب اليوم الهيئه بغت تقفطني وانا مطلع خويتي بس ربك ستر وانحشت منهم..

خالد يقاطعه .. بلاك غشيم والا احد يدور مع خويته بالسياره شوفني انا ازبن في ملحق بيتنا ولا احد درى

ويدخل معه راشد ..تصدقون شباب انا مره واقف عند الصراف يوم صرفت وجيت امشي..اللين ذيك البنت اللي عليها عبايه فراشه ومخصره جايه تمشي من بعيد ومسرعه قلت وشفيها هالبنت؟

يمكن توها شارية هالعبايه وتجربها ..ومادريت الا وهي فاتحة باب سيارتي وراكبه

المهم يوم توني ماشي بالسياره يوم طلعت ذاك المسدس وقالت اطلع للبر ..قلت نعم !1قالت البر

المهم طلعتها للبر في مكان مافيه الا انا وهي والمسدس بينا ..وكنت توي شاري جوال n73 جديد.. المهم قالت لي فصخ ملابسك!!. قلت اكيد ناويه تسرقين الجوال


ويدخل عليهم ياسر بسالفه ثانيه وخويكم خواطرهم يسمع سوالف الشباب ولاهي بعالم ثاااااااني وكل من قال سالفه يقول ياحظك والله

رجعت البيت ودخلت غرفتي وانا بس افكر بكلام الشباب والعن بحظي الردي اللي ماخلاني اعرف ولا بنت .. قمت افكر بالمنتدى واتحسف انا اللي ذابح نفسي تميلح عند البنات ومافي الخاص إلا رسالة واحدة من بنت


وما صدقت يوم شفتها ..بغى يغمى علي .. وبدون تفكير فتحت الرساله …تقول البنت في الرسالة :

" ياملحك وياملح سواليفك … يابخت الي بتاخذك … والله اني ما استانس الا اذا شفت موضوع لك … وبصراحه انا ودي اشوف صورتك احس انك رومانسي وحبوب وو...و ما اقول الا ياحبي لك وبس "


قريت الرسالة وانا ابتشقق وتسندت على الكرسي وقعدت اتخيل انا اصيح وينك يابعد عمري ارجوك تعالي ارجوك ردي علي بسرعه بسرعه ماعاد اتحمل انا احبك بعد


وبعد ماعشت هالحلم الرومانسي الجميل … قلت ياخواطرهم دز لها رساله يمكن ترسل لك رقمها ولا ايميلها!!

وانا اضغط على تحول الرساله وانا اكتب لها ( ...................)

وياليتني ما أرسلت لها ياليتني مت وانا اعيش حلمي الجميل..شوفوا وش قالت بالرسالة بنت اللذين ..


" وجع يوجع قلبك ياقليل الأدب الشرهه مب عليك الشرهه على المدير اللي قبل اشكالك هنا ياحيوان وعلى فكره ترى الرساله مب لك ومدري كيف ارسلتها لبثرين مثلك ... إنقلع"



آآآآه ياخواطرهم انت وحظك الردي .. بس خلاص من بكره ياخواطرهم تطلع السوق وترقم بالطيب ولا بالغصب


ومن بكره قمت وتكشخت ..ودخلت السوق يوم دخلت الين ذيك البنت الي تشق شق الجبهة قاعدة في مدخل السوق جسم وعيون مكحله ناعسه .. عاد هذي النوعيه ماتلقاها دايم هي حبه وحده تجي في كل كرتون

وكان قريب من عند البنت صندوق تبرعات .. قلت زين ياخواطرهم توك مستلم المكافأه أكشخ عندها .. وادخل يدي في جيبي وعيوني لها واطلع اللي معي وانا احطه بالصندوق وهي تناظرني ومستغربة !!

الظاهر اول مره في حياتها تشوف ولد نعمه … بس الوضع صار غير طبيعي البنت قامت تضحك بصوت عالي ..والناس الي جنبها قامو يضحكون واناظر وش السالفة وش صاير … يوم ناظرت الا وانا حاط فاتورة الجوال في الصندوق



طلعت من السوق بسرعه وانا متفشل ومطنقر على الاخر .. اول مانزلت من السوق الا وذيك البنت تناديني!!
التفت عليها واِشرتلي! والشباب اللي حولي يناظروني بحقد ليه هو بالذات؟! وانا اضحك في نفسي واخيرا ضبطت معك ياخواطرهم

ويوم قربت من البنت .. قالت اسفه انا غلطانه كنت احسبك السواق



ضحكوا علي الشباب وطقتني البكوه وانا ناصي سيارتي والا اشوف ذيك البنت اللي عمرها هه بين الخمس واربعين هه والخمس والاربعين وواقفه بالشارع وسياره رايحه باتجاها .. وتنغزني النخوه وانقز لها بانقذها وادفها بعيد عن السياره .. لكن ما امداني ادفها الا والسياره خابطتني


اخر شي اذكره صدام الكابريس موديل 79 ومع الصدمه طار الباقي صحيت والناس حولي يصفقوني ويتكلمون عند راسي اللي يقول هذا مات واللي يقول يحتضر.. فتحت عيني ولقيت أومم كانهم ماقد شافوا سوبرمان وهو ينقذ البنات
..
ولقيت البنت اللي دفيتها تضغط على صدري وتسويلي تنفس اصطناعي وتسمي علي .. وصراحه حسيت بحنان اول مره احسه بحياتي وطقيتها بكوه واصرت هالبنت الا تاخذني المستشفى مع سواقها تطمن علي .. ماقصرت والله دخلتني الطوارئ واخذت معلوماتي علشان تطمن علي


يتبع ع ع

حياة الهنا



جلست في المستشفى يومين وطلعت بصحه وعافيه تامه ولله الحمد..لكن فيه تغير في حياتي اني بديت احب

حبي الجديد كانت اللي انقذتني من الموت اللي ضحيت بروحي علشانها وطلعت هي اللي موقفه قدام السياره علشان تركب مع سايقها وانا اللي احسبها بتصدمها السياره وهان علي اموت معها ولا تموت قدامي


عشت حياة ميب طبيعيه .. لا من جد حياة مختلفه صرت اروح عند البحر واتهيض وانا اسمع الحريبي وهو يقول.."جبتها على الجرح وكنك مادريت ..." وفي احد تهيضاتي دق الجوال

قلت الوووو بصوت ناااعم (تاثير الاغنيه ) ..وقفل الخط بوجهي ..واتصل مره ثانيه .. ورديت باقل نعومه من المره الاولى ..

جاء الصوت من سماعة الهاتف (لاياشيخ ) قال(ت) من معي؟!

قلت انت اللي متصل ياحمار

ضحكت ضحكه ينقصها الدلع (طلعت بنيه )..ضحكت معها شوي وقلت من انتي وايش تبين؟!

قالت خليني احزر من انت من صوتك واسلوبك(ذكيه هالبنت ياعمري )

انت خواطرهم .. هنا ضحكت بعنف وبصوت عالي (خلاص تعرفني ولازم ابين اني رجال )

رجعت وقالت خواطرهم ماعرفتني؟!

قلت تصدقين يوم قلتي انك حمار تحسفت بس الحين اكيد انتي بقره شلون اعرفك من صوتك وانا ما اشوفك

قالت .. انا ابله سعاد .. اللي شلتك للمستشفى ..

قلت .. اهاااااا انتي اللي انقذتك من قدام السياره (<<مازال مقتنع انه انقذها )


تصدقين توني افكر فيك واتذكر الموقف واتخيلك .. تعرفين اني حسيت بحنان عمري ماحسيته وانتي تنقذيني .. ماتتخيلين وش كثر حبيتك .. تعرفين اني كنت اسمع بالحب لكن الحين عرفت طعمه ..
سعاد انتي اللي قلبي حبها واختارك .. سعاد انا كلي لك .. سع....


بس ياخواطرهم كافي .. قطعت قلبي .. ما اقدر اتحمل هالكلام اللي عمري ماسمعته زيه .. خواطرهم وانا بعد من هذاك اليوم وانا معجبه في شجاعتك وفي وسامتك .. خواطرهم ممكن تسمع هالاهداء..


كذاا من ربي حبيته
بسرعه يوم لاقيته
ياناس اللي تمنيته
اخيرا صار محبوبي


خواطرهم : ابله سعاد ..

ابله سعاد: لاعاد تقول ابله ناديني باسمي ..

خواطرهم: سعاد .. انا احبك
.
.
.
مافي رد .. الظاهر انها فطست


استمرت العلاقه بيني انا خواطرهم وبين الابله سعاد .. وكبر حبنا مع الايام وتعلقنا في بعض اكثر


خواطرهم : حبيبتي انتي عمرك خمس واربعين سنه ليه ماتزوجتي؟

ابله سعاد: اييييييييه ياقليبي .. تقدمولي واجد لكن كل مره كنت ارفض لسبب .. مره اقول هذا شكله يبي راتبي ومره اقول هذا شكله ماعجبني ومره اقول انا مدرسه وكلن يبيني وارفض واحيانا اقول هذا مدخن وهذا يلبس نظارات اليين فاتني القطار..
وانا اقول في نفسي ( يحول من هالقطار اللي ماتتزوج البنت اذا فاتها طيب اركبي طياره يعني لازم قطار والا ماتتزوجين )

خواطرهم: احسن ياعمري لو مارفضتيهم كان ماعرفتك .. سعسوعتي .. وش تتمنين؟

ابله سعاد: كنت اتمنى ياخذني واحد جيزاني!! والله الوناسه وسعة الصدر كان ما ادوام ابد بتصير حياتي كلها اجازة امومه ..


بس الحين مابي الا انت ياخطخوطي.. طيب انت وش رايك بالمرأه؟

خواطرهم : بصراحه المرأه عندي كالجزمه في بستان مليء بالشوك..فالجزمه تجعلك تتجاهل وجود الشوك (<< ابو اللي يسألك مرتن ثانيه )


دارت الايام واستمرت علاقتنا..وصرت اقولها مره بطني يعورني ومره ضرسي يؤلمني ومره خدي.. وهي تققولي روح للدكتور!!

وانا اقولها انتي ماتفهمين! قلت طيب قولي انتي بطني يعورني !

قالت.. لا انا بطني مايعورني

قلت.. انتي قولي بس ومايصير لك شي

قالت.. لا الفال شين ويجي مع الطاري

جلست اقنع فيها اسبوعين بدون فايده .. الين جاء ذاك اليوم وقالت بطني يعورني وهو صدق يعورها

قلت..اموووووووووووووووووووووووه على بطنك علشان يطيب

قالت هذي وشي!! قلت بوسه!

قامت سفلت فيني وقالت هذي اخرتها ياقليل الحيا تقول لي كلام وسخ وقفلت بوجهه وقاطعتني اسبوعين


بعد اسبوعين دقت علي وقالت.. قلبي ماطاوعني ابعد عنك

وانا اقول.. سامحيني والله ما اعودها وما عاد اقول كلام وسخ

قالت.. احلف انك تتوب قل قسم

وانا اطق ذيك الايمان واتوسلها تسامحني وقلتلها..ما عاد اقوى على فراقك خلاص اليوم العصر امي بتجي تخطبك!!

وهي اللي تتقطع من الفرحه وتقول .. خلاص سامحتك وانا بانتظرك انت وخالتي ( مسرع يا المشفوحه )



خواطرهم : يمه انا خلاص قررت ابي اخطب وأتزوج

امي: الساعه المباركه ياولدي.. تبيني ادور لك؟!

خواطرهم : لا يمه .. انا خلاص حطيت عيني على البنت وهي مدرسه

ام خواطرهم: ماشاء الله مدرسه .. اجل زين مااخترت

خواطرهم : خلاص يمه عقب صلاة العصر بنمر انا وياك نشوف البنت واذا اعجبتك نخطبها..

ام خواطرهم: زين ياولدي..


ومن عقب صلاة العصر تسنع خويكم خواطرهم وتكشخ وازعج امه الين جهزت ورواحوا يخطبون ابله سعاد اللي تجهزت من عقب صلاة الظهر للزياره

دخلوا خواطرهم وامه للمقلط بانتظار دخول العروس ..

ابله سعاد وبعد عدة محاولات دخلت الغرفه وبيدها العصير ..


وفجأه ..


جات عينها بعين ام خواطرهم ويطيح من يدها العصير !!

أم خواطرهم وبعد صراااخ وسب وتهزيء قالت .. مابقى الا هي ولدي يتزوج مديرة المدرسه اللي درست فيها




مايستفاد من القصه ..


1- يابنات تلاحقوا على اعماركم ولا تشرطون واجد وحتى لو طلع اللي تقدم مامعه الا رابع ابتدائي وافقوا تراه ازين من العنوسه ..


2- ياشباب ارفقوا على انفسكم يعني مو بلازم تصير لك خويه .. وارفقوا على اهاليكم بعد مايكفي انك تبيهم يدخلونك مدرسه اهليه ويطلعلون لك سياره وفوق هذا تبيهم يزوجونك


3- ليه المشرفين لونهم أزرق !!

4- هالقصه كلها تخيلات يعني لاحد ينضرب بمخه ويصدق وتتشوه السمعه عقبها تروا اهم شي السمعه بعدين محد يزوجني ..

خطرنجيه
والله قصه فله
خواطرهم : بصراحه المرأه عندي كالجزمه في بستان مليء بالشوك..فالجزمه تجعلك تتجاهل وجود الشوك (<< ابو اللي يسألك مرتن ثانيه )

ههههههههههههههههههههههههههههههه
الله والله عليه مشاعر ووصف طيب مردوده
يسلموووووووووووووووووووووووووو

ههههههههههههههههههههههههههههه

ترآ مآلي خوووص آنآ < بدينآ جحد هع هع

يسلموو على مرورك < مآيقرى الرد ههههههههههههههههههههه