تعودنا في حياتنا اليومية نستخدم «كلمة رجال» أو «كلام رجال» يعنى نقصد انه كلام ثابت ما يتغير مهما تغيرت الظروف لكن الحياة تغيرت وكلام الرجال تحولت إلى كلام يهال!! واليوم لازم الواعي ما يصدق لا كلام رجال ولا غيره، فالرجال أنواع منهم كلامه يتغير في يوم وليلة والامثلة كثيرة اشكثر شفنا وسمعنا عن رجل اشترى سيارة اول يومين يمدح السيارة ويوديها السما، ومن كلامه ما تمشي في شارع السد إلا الكل يطالعك اتحداك اذا حد يتجرأ ويلف عليك قوية لو بعتها اليوم تحصل فيها فايدة ثلاثة كلموني عشان ابيعها سحبيتها عجيبة، لكن المشكلة ان نفس الرجل كلامه يتغير في اقل من شهر وتشوفه يذم نفس السيارة ويقول يا أخي متوهق في السيارة قطع غيارها مب متوفر والوكالة تعبانة والسيارة فيها نفضة وحرارة.

الموضوع ذاته يتكرر عندما يتزوج الرجل فأول اسبوع تشوفه يمدح الزوجة ويقول والله بنت ناس الزواج زين ما شاء الله نظيفة والطباخ تمام وفاهمة واهلها ناس محترمين اما عقب شهر نشوف الزوج يذمها كل يوم رايحة بيت ابوها انا استغرب اهلها ما علموها السنع حنانة ما تقعد في البيت صريفة وتحب المظاهر والله مشكلة.

أما اذا واحد بغى يتسلف من رجل فالحوار كالتالي يقول له ابشر وما يصير خاطرك الا طيب ولا يهمك بس عطني فرصة يومين بينزل لي بدل سكن أو ببيع سيارتي وبعطيك او ببيع الاسهم وبعطيك وتشوفه بعد يومين يتشرد وما يرد على الموبايل او حتى يغير رقم موبايله ويتصدد ويمكن بعد يسافر، اما بعض الشباب اللي يحاولون انهم يسترزقون بالكذب على الناس وشعارهم «كلمة ريّال» منهم اللي يحاول يبيعك سيارة ويقولك انها جديدة مستعملة شهرين بس وحالتها زينة مع ان الحقيقة ان السيارة مدعومة وما تسوى ومستعملة سنتين مب شهرين واللي يحاول يبيعك بيت ويقنعك ان البيت وايد زينة وسعرها رخيص والحقيقة ان البيت عليه مشاكل والمؤجر مب راضي يطلع، يعني خلاصة الموضوع ان كلمة الرجل تغيرت اليوم وصارت لها معاني كثيرة وصاروا كثير من الرجال يستغلون الاخلاق وثقة الناس فيهم ولذلك لازم نحترس من هؤلاء وما نصدق اللي يقولونه لأنه كلام رجال يعني «خرطي».

هههههههههههههههههههههههههههه حلوووووة حلوووووووووووووة ياااخرررطي